Convocacion de comunicacions

Aguesta session, centrada en explorar estrategies destinades a melhorar era valor intrinsèca des productes agricòles des zònes de montanha, tractarà tèmes capitaus de discussion coma son era implementacion de sistèmes de marketing dirècte, era optimizacion des canaus de distribucion, era integracion de certificacions ecologiques e era diversificacion damb eth coitiu de naui productes, coma plantes medicinaus o vinhes. Ath delà, s’i debateràn es escomeses e es escadences inerentes ara agricultura de montanha, particularament en contèxt deth cambiament climatic.

Aguesta session examinarà estrategies transformadores orientades a modelar eth païsatge economic territoriau. Tractarà tèmes claus entath desvolopament sostenible des regions de montanha coma son era transformacion des matèries prumères en madeish lòc de produccion o era atraccion de d’autes industries (per exemple, deth sector biomedic o der esportiu) que fomenten eth sector segondari, actuaument desapareishut, damb era tòca de preservar e promòir locaument era valor ahijuda. Quines iniciatives contribuïssen a mantier tant es negòcis coma era sua valor ena montanha? Aguesta session servirà de contèxt entath debat e entà compréner es matisi des escomeses e es escadences inerentes ara transformacion territoriau capabla d’influïr en teishut socioeconomic des regions de montanha.

Aguesta session explorarà eth potenciau transformador dera digitalizacion e er impacte qu’a enes modèls de negòci, era ocupacion e eth desvolopament d’abilitats. Es tòques seràn descorbir amires innovadores entà profitar es tecnologies digitaus entath creishement economic e explorar paradigmes emergenti que redefinisquen es estructures de trabalh e formacion tradicionaus. Eth talhèr proporcionarà un encastre entà compréner es escadences que presente era digitalizacion ena diversificacion dera economia, e tanben eth ròtle dera intelligéncia artificiau ara ora de facilitar eth desvolopament economic des airaus de montanha.

Aguesta session analisarà aspèctes capitaus deth desvolopament economic e coma es administracions publiques pòden dar sosten as pimes, es microenterpreses e es autonòms. Era session explorarà manères de promòir estructures legaus innovadores, coma enterpreses cooperatives e enterpreses sociaus. Tanben aurà per tòques compartir amires entà estimular era innovacion e dar sosten as enterpreses emergentes, mès que mès es sectors prometeires coma era economia d’argent, e compartir estrategies entà promòir entorns de trabalh innovador (espacis de cotrabalh, clusters d’enterpreses, hilats d’espacis de trabalh, etc.).

Aguesta session destacarà era importància primordiau deth sector terciari enes zònes de montanha, e analisarà quin futur e quines implicacions a entara economia locau. Se centrarà ena exploracion deth futur deth torisme de montanha e examinarà tèmes principaus coma s’ei melhor mantier es amires tradicionaus dera diversificacion o vau mès trobar manères naues, innovadores e disruptives de desvolopar un aute torisme de montanha. Eth talhèr tractarà especificament era transformacion des estacions d’esquí e era utilizacion estrategica der interès creishent ena salut e er espòrt. Aguesta session aufrirà ua escadença entà aprigondir enes fòrça aspèctes que configuren eth futur deth torisme de montanha, en tot includir-i era alineacion estrategica damb era natura e eth potenciau de naui negòcis toristics. Per exemple, s’i debaterà eth concèpte de era natura coma negòci (qu’includís era reïntroduccion dera fauna sauvatja, es espacis naturaus privats e eth desvolopament de naui productes toristics basadi ena natura coma era caça o es retirades espirituaus) e se s’aurien de fomentar o non aguesti modèls.

Aguesta session serà dedicada ara reconeishença, era mesa en valor e era possibla compensacion des servicis proporcionadi pes activitats agropecuàries enes montanhes. Aurà per tòca explorar estrategies qu’equilibren era preservacion des ecosistèmes damb eth benèster economic des qui contribuïssen a hèr-ne ua gestion sostenible. Eth talhèr cercarà illustrar eth concèpte mejançant exemples innovadors que reüsiràn en quantificar e remunerar es diferenti servicis ecosistemics.

Era vida enes montanhes a fòrça beneficis que soent s’ignòren o sosestimen. Ath delà des escomeses associades as servicis essenciaus coma era salut o era educacion, era vida enes montanhes aufrís un entorn naturau, ua cultura rica e diuèrsa, e escadences entath desvolopament personau e professionau. Aguest talhèr aurà per tòca daurir un debat sus coma cambiar era narrativa restacada damb era qualitat de vida enes montanhes, e coma reconéisher e avalorar eth ròtle qu’es comunitats de montanha an en benèster sociau e environamentau. S’e tractarà era importància des infrastructures sociaus (per exemple, es tresaus lòcs e es autes installacions destinades ara comunitat) e coma ua activitat economica diuèrsa e sostenible pòt ajudar a cambiar era narrativa des zònes de montanha.